Citations Charles Quint

Et me semble que estant le papat en votre main, et lempyre en la myenne, est pour faire par ensemble beaucop de bonnes et grandes choses: et doit estre une mesme chose et unanime des deux, et lamour et obeissance que vous porte, nest maindre que celle que bon filz doit porter a son propre pere, et comme telle ne devez avoir nulle doubte, quen sorte du monde en voulsisse user aultrement.

Et pour ce quentre pere et filz ne doit auoir nulle couverture, mais declerer ce que chacun a sur le cueur, suis constrainct de vous escripre ce que lon ma dit, puisque ne suis aupres de vous, pour le vous dire de bouche: et est que jay este adverty, que aulcuns vous doivent avoir informe, que nay este cause de votre ellection, et quen ay eu le plustost regret, que joye.

Outre plus, affin que le traite qui se fera soit mieux entretenu, et quil ny ait que redire, et que lon ne soit toujours a recommencer, nous semble etre necessaire dy mettre encores un article que soit reciproque, tant pour lun que pour lautre, a lencontre de celuy qui contreviendra, en la maniere que sensuit:

Ayant vu par vos lettres et par icelles de mon viceroi de Naples, de don Hugo, et par la relation de Jean Lallemend la conclusion qui sest pris de la paix entre vous et moi, qui estoit chose que tant je desirois, et dont jai eu merveilleux plaisir pour le service que dicelle en reviendra, si nous nous acquitons, comme ne fais doute que vous de votre cote et moi du mien ferons.

Et apres les choses dessusdictes me semble, que mon honneur et bien particulier y a este tresbien garde, combien que je croy, que si jeusse volu plus regarder a mon prouflict que a la reste, que je le euisse bien peu grandement faire; mais ja dieu ne veulle, que je aduanche mon bien particulier es choses qui peuent touchier a son seruice et bien vniuersel.

Jentendz bien, que ces choses ne sont souffisantes, pour satisfaire a la paine et traueil que prenez en mes affaires, ne a la bonne volunte que je suis seur que y prenez; mais ad ce satisferay de la mesme volunte reciprocque que vous porte, quj nest seullement comme de nepueu a tante, aussy comme de bon filz a vraye et bonne mere.